campuvallone

   

Campu Vallone : U situ di a filera bislingua di u Cullegiu di Biguglia


U guvernu di Pasquale Paoli

u 5 di Dicembre 2016

Hè in Castagniccia chì Pasquale Paoli hè elettu capigenerale di a nazione corsa.

L'elezzione dura trè ghjorni, da u 13 à u 15 di lugliu di u 1755, à u cunventu Sant'Antone di A Casabianca.
U guvernu di Pasquale Paoli


Da u 1755 à u 1769, Pasquale Paoli guverna a Corsica d'una manera assai muderna à l'epica. Tandu, a maiò parte di i paesi d'Auropa sò guvernati da rè. U putere si trasmette da babbu à figliolu u rè hà u putere di fà ciò ch'ellu vole.

Pasquale Paoli hà fattu i so studii in a cità taliana di Napuli. Parla parechje lingue, hà studiatu a literatura, a storia, a filusufia. S'impregna di ciò ch'elli dicenu l'intellettuali di u so tempu.

Si parla di a filusufia di i Lumi (in francese : "philosophie des Lumières"). Cum'è i grandi intellettuali di u so tempu, Pasquale Paoli vole luttà contr'à l'oppressione di u populu da i tirani è l'intullerenza.

Face aduprà una custituzione assai originale per l'epica perchè stabbilisce una di e prime demucrazie d'Auropa. I capimachja sò eletti da u populu.

Pasquale Paoli pensa chì ciò chì hà da aiutà u populu hà sorte di a miseria hè di studià. Hè per quessa ch'ellu crea l'università di Corsica, in Corti.

U guvernu di Pasquale Paoli

Crea una muneta corsa, chì hè fatta in u paese di Muratu. Si chjama u soldu.
U guvernu di Pasquale Paoli

Crea un portu, in l'Isula Rossa. Rilancia l'agricultura.

U grande filosofu francese Jean-Jacques Rousseau scriverà :

« Il est encore en Europe un pays capable de législation, c’est l’île de Corse. La valeur et la constance avec laquelle ce brave peuple a su recouvrer et défendre sa liberté mériterait bien que quelque homme sage lui apprît à la conserver. J’ai quelque pressentiment qu’un jour cette petite île étonnera l’Europe. »

Pasquale Paoli
Pasquale Paoli

Ma i Francesi facenu compie u statu di Pasquale Paoli. In u 1769, u rè di Francia manda a so armata in Corsica. Tandu a Francia hà a più grande armata di u mondu.
 
D'ottobre di u 1768 i Francesi perdenu una grande battaglia in U Borgu.

U guvernu di Pasquale Paoli

Ma l'8 è u 9 di maghju di u 1769, l'armata di Pasquale Paoli perde contr'à quella di Francia, in Ponte Novu.
 
C'eranu 5000 suldati francesi, contr'à 1200 suldati paolisti.
U guvernu di Pasquale Paoli

U guvernu di Pasquale Paoli

Pasquale Paoli hè custrettu à parte in esiliu in Inghilterra. Si ne và à campà in Londra, induve hè ricevutu cum'è un grande dirigente.

Oghje a so memoria hè sempre onorata in a cità di Londra :​

U guvernu di Pasquale Paoli

In Italia parechji carrughji è piazze portanu u nome di Pasquale Paoli (in Firenze, Milanu, Roma...)

À i Stati Uniti ci sò cinque cità chì si chjamanu Paoli. Duie si chjamanu Corsica, una Corsicana in omagiu à u Babbu di a Patria.

U guvernu di Pasquale Paoli

u 5 di Dicembre 2016