campuvallone

   

Campu Vallone : U situ di a filera bislingua di u Cullegiu di Biguglia

Testimoniu : Petru Campana

u 13 di Sittembre 2013

"Charles viendra ce soir"


Testimoniu : Petru Campana

Ci simu reuniti quì, vuliamu attaccà à Champlan. Quandu’è vo cullate in Champlan sta lenza custì era un depositu d’essenza, tutta l’essenza era custì avia da serve quessa l’essenza quandu l’alemani avianu da sbarcà versu Portivechju per falà in Bastia è quessi s’avianu da ravitaglià in essenza custì à Champlan ind’è noi, i camiò chì passavanu per imbarcà si in Bastia chì avianu da parte in cuntinente per fà a guerra torna quallà per andà in Russia o andà induve ùn sò. Allora emu dettu ma ùn l’emu micca da lascià li parte cusì l’alemani pianu pianu ci vole à fà li a guerra ancu noi, ci vulemu vendicà ancu noi

Allora ci eramu reuniti, è a notte simu falati sottu quì ci hè una machja, emu decisu sò ch’aviamu da fà è a matina aviamu da attaccà u depositu.

Allora a matina l’emu attaccatu u depositu, : ci era Vittori di Porri, …tutti i purrinchi, ci eramu tutti quelli chì… allora a matina emu pigliatu i nostri posti avanti u ghjornu longu di u fiume è aspettavamu l’alemani i vidiamu quallà in lu so depositu.

È versu 7 ore sò venuti per lavà si, ind’è u fiume, si lavavanu ind’è u fiume, eranu « torse nu » è tuttu è custì l’emu ricevuti bè, à colpi di mitragliette è à fucilimitragliori ! È l’emu tenuti sinamente à duie ore di u dopumeziornu. À duie ore è mezu sò affaccati cù e « chenillettes » è vitture mitragliose, nantu, armate, munizione… È quessi ci anu apertu u focu. Ùn eramu più in cosa di pudè li tene, allora ci ne simu cullati ind’è i nostri paesi, simu ghjunti à quattru ore, emu avutu quantunque unu chì ghjè mortu, un giuvanottu chì hè statu tombu avia vinti anni. È po ci n’era unu chì ghjera quì di A Casalta chì hè statu feritu, un certu Pasqualini. È l’emu cullatu cun noi. Quessu chì hè statu feritu, v’aghju da fà ride, quandu l’emu strascinatu dicia « Eramu peghju chè à Verdun quì ! ». Avia fattu Verdun, a guerra di 14-18, è era falatu cun noi, ci hà fattu ride ! L’alemani, ùn possu micca dì vi u ghjustu, perchè ùn l’emu micca visti, ùn simu micca andati à vede li, dopu ùn ci pudiamu più andà. Ma « soit disant » a ghjente chì l’anu visti, ci era 45 morti. ( … )

L’emu arrangiati, ci simu vendicatu ancu noi. N’emu avutu abbastanza.
 

Chì ghjera u vostru rolu ind’a resistenza ?

Oghju fattu i « parachutages », aghju piattatu l’arme, ci vulia à piattà le, è sò statu à Champlan cum’è tutti per fà « le coup de fusil ».
 

Quantu erate ?

Quantu eramu noi ? Eramu , quandu falavamu à Champlan ci eramu quasi tutti, i trè paesi, i giovani ci eranu tutti. U pianu, U Silvarecciu, eramu tutti quaghjò una settantine, ottanta…Eramu parechji, tandu falavanu a ghjente…
 

Cumu erate urganizati ?

Ci eranu i respunsevuli, ùn eramu micca sottu à l’armata custì . Ci era Vittori, ci era Arrighi quessi eranu quelli chì ci anu falatu à Champlan Quessi eranu quaio… È dopu l’altri purtavamu e munizione, è tuttu, ci era u travagliu. (…) U ghjornu di a liberazione era à Sigmaringen in Alemagna, eramu sempre in prima ligna. Ghjè statu u ghjurnacciu per noi perchè a matina à sette ore sò ghjunti dui culleghi, unu si chjamava Giamarchi è unu era di Bastia. Anu pigliatu una mottò, « Induve andate cù a mottò ? » Mottò ci ne era da per tuttu in Alemagna eramu noi i patroni dopu . Aghju dettu : « Manghjate un pezzu di pane cun noi ! » « Innò, innò, emu da fà un giru. » Ci era un grande terrenu, cullavanu i Dakota, l’aviò. Cullavanu u materiale per l’essenza, per… L’armata andava talmente in furia chì u « pipeline » ùn seguitava più. Emu curatu un pocu stu terrenu custì. Elli : « Emu da fà u giru di u terrenu. » Aghju dettu : « Ùn ci andate micca, i sentite i canoni ?! » Dicenu : « Ma hà da esse l’armistizia » « Ah serà, serà. Ma per avà ùn ghjè ancu ! Tiranu ! » È po sò partuti. Un’ oretta dopu colla l’aspirente è mi dice « Campana, ci vole ch’è tù falghi à u PC ». (…) Sò falatu ci era un « drap ». « Pesa. » Aghju pesatu, eranu dui morti. Ci era un « char » chì ghjera arrestatu ind’ a machja, di l’alemani, anu vistu cullà sti dui suldati… (…) Sò stati morti tutt’è dui. Quessa hè stata u ghjornu di l’armistizia. À ondeci ore aviamu l’armistizia. À ottu ore quessi eranu morti. Dumandate, l’ottu maghju sò malatu. Eranu dui amichi…

 


Intervista realizata da Dumenicu Demasi u 19 di ghjugnu 2013 à A Casalta.
u 13 di Sittembre 2013